امیر المومنین سیدنا حضرت علی کرم اللہ وجہہ کے فضائل و مناقب

امیر المومنین سیدنا حضرت علی کرم اللہ وجہہ کے فضائل و مناقب  :۔

آپ کرم اللہ وجہہ کا اسم گرامی علی۔ کنیت ابولحسن و ابو تراب، القاب اسد اللہ الغالب ، ؒحیدر اور المرتضیٰ ہیں۔ یہ تمام القلوب آپ کرم اللہ وجہہ کو حضور سید کونین ﷺ نے مختلف مواقع پر مرحمت فرمائے تھے ۔ آپ کرم اللہ وجہہ کی ولادت عام الفیل کے 7 برس بعد ہوئی ۔ آپ کرم اللہ وجہہ کا تعلق قبیلہ قریش کے معزز ترین خاندان بنو ہاشم سے تھا ۔ آپ کرم اللہ وجہہ نہ صرف حضور اکرم ﷺ کے چچا زاد بھائی بلکہ آپﷺ کے پروردہ بھی تھے ۔بچپن میں ہی آپ کرم اللہ وجہہ کے والد حضرت ابو طالب نے آپ کرم اللہ وجہہ کو اپنے بھتیجے حضور سید کونین ﷺ کے سپرد کر دیا تھا ۔ آپ کرم اللہ وجہہ کا شمار سابقین اولین کی صف اول میں ہے ۔  اسلام قبول کرنے والے بچوں میں آپ  کرم اللہ وجہہ کا پہلا نمبر ہے ۔ جبکہ آپ کرم اللہ وجہہ کی عمر 8 یا 10 برس تھی ۔ آپ کرم اللہ وجہہ کو ہجرت کرنے کا اعزاز بھی حاصل ہے ۔ ہجرت مدینہ کے موقع پر آپ کرم اللہ وجہہ حضور اقدس ﷺ کے حسب ارشاد لوگوں کی امانتیں ان کے حوالے کر کے وسط ربیع الاول 13 نبویؐ میں مدینہ منورہ پہنچے ، جب حضور اکرم ﷺ نے مہاجرین و انصار کے درمیان مواخات قائم فرمائی تو آپ کرم اللہ وجہہ کو حضرت سہل بن حنیف انصاری رضی اللہ عنہ کا دینی بھائی بنایا تھا ۔ رجب 2 ہجری میں سرور کونین ﷺ نے 21 یا 24 سا ل کی عمر میں اپنی سب سے چھوٹی صاحبزادی حضرت سیدہ فاطمۃالزہرا ء رضی اللہ عنہا کے ساتھ آپ کرم اللہ وجہہ کانکاح کیا ۔ اس وقت خاتون جنت رضی اللہ عنہا کی عمر 16 یا 19 برس تھی ۔ حضرت علی المرتضیٰ کرم اللہ وجہہ کے چیدہ چیدہ جہادی کارنامے ذکر کئے جاتے ہیں۔

٭غزوہ بدر (2ہجری) میں آپ کرم اللہ وجہہ نے قریش کے دو سردار، رہمناؤں ولید بن عتبہ اور شیبہ بن ربیعہ کو قتل کیا ۔ ٭ غزوہ احد (3 ہجری ) میں آپ کرم اللہ وجہہ لشکر اسلام کے میمنہ (دائیں حصے) کے امیر تھے ۔ حضرت سیدنا مسعب بن عمیر رضی اللہ عنہ کی شہادت کے بعد علم آپ کرم اللہ وجہہ کے ہاتھ میں آیا ،کفار کے علمبردار ابو سعید بن طلحہ کی دعوت مبارزت کے نتیجے میں اس کا بے جگری سے مقابلہ کیا اور اس کو واصل جہنم کر کےدم لیا ۔ اسی جنگ میں متعدد مشرکین کے علاوہ کفارہ کے چوٹی کے رہنما ابوالحکم کو بھی موت کے گھاٹ اتارا۔ جب گھاٹی پر متعین تیر اندازوں کی غلط فہمی سےجیتی ہوئی بازی ہارنے کا خطرہ پیدا ہوا تو جو صحابہ کرام رضوان اللہ علیہم اجمعین میدان میں ثابت قدم رہے ان میں آپ کرم اللہ وجہہ بھی شامل تھے ۔ نبی اکرم ﷺ کو سہارا دینے والے آپ کرم اللہ وجہہ اور حضرت طلحہ رضی اللہ عنہ تھے ، جنگ کے اختتام پر حضورنبی اکرم ﷺ کے خون مبارک کو صاف کرنے کیلئے آپ کرم اللہ وجہہ ڈھال میں پانی بھر کر لاتے جاتے اور حضرت فاطمۃالزہراء رضی اللہ تعالیٰ عنہا زخم کو دھوتی جاتی تھیں

٭غزوہ بنی نضیر (4ہجری) میں آپ کرم اللہ وجہہ کے ہاتھ میں لشکر اسلام کا علم تھا ۔ غزوہ خندق (5 ہجری) میں آپ کرم اللہ وجہہ نے قبیلہ بنو عامر کے مشہور جنگجو عمرو بن عبدود کو ، جو اکیلا ایک ہزار سواروں کے برابر سمجھا جاتا تھا ، قتل کیا ۔ اسی سال غزوہ خندق میں بدعہدی کرنے والوں کی سرکوبی کیلئے جو دستے بھیجے گئے ان کے علمبردار بھی آپ کرم اللہ وجہہ تھے  صلح حدیبیہ (6 ہجری ) میں صلح نامہ لکھنے کا شرف بھی آپ کرم اللہ وجہہ کو حاصل ہوا ، آپ کرم اللہ وجہہ نے گواء کے طور پر اس عہد نامے پر دستخط بھی فرمائے ۔ غزوہ خیبر (7 ہجری ) میں  خیبر کے 12 قلعوں میں سے ایک قلعہ حصن القموص کی فتح میں شدید دشواریاں پیش آئیں ، بالآخر یہ قلعہ آپ کرم اللہ وجہہ کے ہاتھوں فتح ہوا ، اسی معرکے میں مرحب نامی مشہور جنگجو آپ کرم اللہ وجہہ کے ہاتھوں اپنے انجام بد سے دو چار ہوکر واصل جہنم ہوا ۔ فتح مکہ (8 ہجری ) میں آپ کرم اللہ وجہہ نے بحکم نبی اکرم ﷺ ایک کافر کو قتل کیا ، اسی سال غزوہ حنین میں جب بنو ہوازن کےیکدم حملہ آور ہونے سے بھگدڑ مچ گئی تو آپ کرم اللہ وجہہ ثابت قدم رہے اور جان نثاری سے شجاعت کے جوہر دکھائے ، غزہ تبوک (8 ہجری) میں حضور اقدس ﷺ نے آپ کرم اللہ وجہہ کو اپنے خانگی معاملات اور کچھ انتظامی امور کی نگرانی کے حوالے سے مدینہ منورہ میں قیام کرنے اور جنگ میں حصہ نہ لینے کا حکم دیا۔ جسے تعمیل حکم میں آپ کرم اللہ وجہہ نے قبول فرمایا ، ورنہ آپ کرم اللہ وجہہ کی ذاتی خواہش جنگ میں بنفس نفیس شریک ہونے کی تھی ، اسی موقع پر آپ ﷺ نے یہ جملے ارشاد فرمائے ، اے علی کرم اللہ وجہہ ! کیا تم یہ پسند نہیں کرتے کہ تم میری طرف سے اسی مرتبے پر ہو جس مرتبے پر حضرت موسیٰ علیہ السلام کی طرف سے حضرت ہارون علیہ السلام تھے ۔ مگر یہ کہ میرے بعد کوئی نبی نہیں ۔ حج ( 9 ہجری ) میں چند خاص اعلانات کیلئے حضور اکرم ﷺ نے آپ کرم اللہ وجہہ کو روانہ فرمایا واضح رہے کہ یہ حج حضرت سیدنا صدیق اکبر رضی اللہ عنہ کی امارت میں ہوا تھا ۔

٭ حجۃ الوداع کے موقع پر 63 اونٹ تو آپ ﷺ نے اپنے دست مبارک سے ذبح فرمائے جبکہ بقیہ اونٹ حضرت علی کرم اللہ وجہہ نے ذبح فرمائے منیٰ میں آپ کرم اللہ وجہہ نے حضور اکرم ﷺ کے خطبات مجمع تک پہنچانے کیلئے معبر کے فرائض بھی انجام دیئے ۔ حضور اکرم ﷺ کی رحلت کے بعد خلیفہ اول بلا فصل حضرت سیدنا صدیق اکبر رضی اللہ عنہ نے آپ کرم اللہ وجہہ کو اموال خمس کی تقسیم کے سد باب کیلئے بھیجے جانے والے ایک دستے کا امیر بھی آپ کرم اللہ وجہہ کو مقرر فرمایا۔ حضرت سیدنا فاروق اعظم رضی اللہ عنہ نے آپ کرم اللہ وجہہ کو ان تمام عہدوں پر برقرار رکھا اور مزید مناصب بھی عطا فرمائے جن میں قاضی کا منصب بھی شامل تھا۔ حضرت سیدنا عثمان غنی رضی اللہ عنہ ، نے بھی آپ کرم اللہ وجہہ کو سابقہ مناصب پر برقرار رکھا ، حدود کے تمام فیصلے حضرت علی کرم اللہ وجہہ کی عدالت میں ہوتے تھے ، جمع قرآن کا کام بھی آپ کرم اللہ وجہہ کے مشورے سے ہوا  حضرت شیدنا عثمان غنی رضی اللہ عنہ کی شہادت کے بعد 35 ہجری کو صحابہ کرام رضی اللہ عنہم کے اتفاق رائے سے چوتھے خلیفہ راشد مقرر ہوئے ۔ آ پ کرم اللہ وجہہ نے اپنے پیشر و خلائے راشدین رضی اللہ عنہم اجمعین کی پالیسیوں کو برقرار رکھا ، خلیفہ بننے کے تیسرے روز ہی سازشی سبائی ٹولے کو بلا کر فوری طور پر مدینہ چھوڑنے کا حکم دیا ۔ یوں ان کے ارادوں پر پانی پھر گیا اسی روز سے وہ آپ کرم اللہ وجہہ کے بھی دشمن بن گئے ۔ ان کی سازشوں کے نتیجے میں مسلمانوں کے درمیان جنگوں تک کی نوبت بھی آئی ۔ جنگ نہروان میں خوارج کو شدید نقصان اٹھانا پڑا اسی روز حرم مکہ میں ایک میٹنگ میں انہوں نے کبار صحابہ کرام رضی اللہ علیہم کو شہید کرنے کا منصوبہ تیار کیا ۔ حضرت علی کرم اللہ وجہہ کے قتل کی ذمہ داری عبدالرحمن بن ملجم کو سونپی گئی ۔ منصوبے کے مطابق 17 رمضان المبارک 40 ہجری میں نماز فجر کے موقع پر اس بدبخت نے آپ کرم اللہ وجہہ کے سر کے اگلے حصے پر وار کیا ۔ آپ کرم اللہ وجہہ کی ریش مبارک خون سے رنگین ہوگی ، آپ کرم اللہ وجہہ شدید زخمی ہو گئے  اور 3 دن بعد شہادت کا عظیم رتبہ پایا ۔ مدت خلافت 4 سا 9 ماہ ہے ۔آپ کرم اللہ وجہہ کی تدفین کے موقع پر آپ کرم اللہ وجہہ کے بڑے صاحبزادے حضرت حسن مجتبیٰ رضی اللہ عنہ نے جو خطبہ دیا اس میں ارشاد فرمایا لوگو تم سے ایک ایسا شخص رخصت ہو گیا جس سے اگلے علم میں پیش قدمی کر سکےنہ پچھلے اس کی برابری ، کر سکیں گئے ۔ رسول اللہ ﷺ اس کے ہاتھ میں اسلام کا جھنڈا دیا کرتے تھے اور اس کے ہاتھ پر فتح نصیب ہو جاتی تھی انہوں نے چاندی سونا کچھ نہیں چھوڑا صرف اپنے وظیفے میں سے 700 درہم ورثا کے لئے چھوڑے ہیں ۔ قارئین کرام ! یہ آپ کے زہد کی ایک ادنیٰ مثال ہے ۔ دوسری طرف آپ کرم اللہ وجہہ کی سخاوت بھی ضرب المثل  کی حثیت رکھتی ہے ۔ 40 ہزار دنیار سالانہ تو آپ کرم اللہ وجہہ زکوٰۃ کی مد میں ادا کیا کرتے تھے ۔ اللہ تعالیٰ مسلمانان عالم کو اسد اللہ الغالب حضرت سیدنا علی ابن ابی طالب کرم اللہ وجہہ کے نقش قدم پر چلنے کی توفیق عطا فرمائے ۔ آمین!