سورۃ الم نشرح کا وظیفہ

میری شادی ہماری برادری سے باہر آج سے آٹھ سال پہلے ہوئے‘ مگر میرے شوہر شادی سے پہلے ہی قرض جیسے لعنت میں مبتلا تھے جس کے بارے میں ہم گھر والوں کومعلوم نہیں تھا‘ اس قرض کے چکر میں میرے سارے زیورات بھی بک گئے‘ میرے شوہر کاسمیٹکس کا کاروبار کرتے تھے‘ میں ان آٹھ سال میں تین مرتبہ اپنے ابو کے گھر رہ چکی ہوں‘ اب گزشتہ ایک سال سے اپنے ابو کے گھر رہ رہی ہوں‘ الحمدللہ میرے والد کے مالی حالات بہت بہتر ہیں اللہ انہیں جزائے خیرعطا فرمائے۔ میرے شوہر دل کے بہت اچھے ہیں‘ میرے اور اپنی بیٹی کےساتھ بہت پیارمحبت کرتے ہیں‘ پھر کچھ عرصہ میری زندگی میں سکون آیا اور ایک دن وہ کسی کی گاڑی لےکر کہیں گئے مگر وہ گاڑی ان سے کسی نے چھین لی‘ خوف کے مارے کسی کو نہ بتایا اور آج کل کرتے رہےاور پھر ان کے خوف سے کہیں چلے گئے اور میں اپنے ابو کے گھر آگئی‘ اس دوران ان کا کچھ پتہ نہیں چلا پھر ایک دن میرے سسر کو وہ مل گئے اور میرے سسر نےاپنا فلیٹ بیچ کر ان کا قرض اتارا۔ میں پھر اپنے گھر واپس چلی گئی۔ اس کے بعد میرے شوہر نے سپیئرپارٹس کا کاروبار شروع کیا اور میں نے بھی کچھ عرصہ خوشحالی کا دوردیکھا مگر زیادہ نہیں۔میرے شوہر نے کسی کے ساتھ مل کر (پارٹنرشپ) امپورٹ ایکسپورٹ کاکاروبار شروع کیا‘ اس کام کیلئے بڑی رقم کی ضرورت تھی اس کیلئے میرے شوہر نے لاکھوں کی رقم لی لیکن وہ آدمی ان کو دھوکہ دے گا‘ ہم کرائے کے گھر پر آگئے‘ قرض داروں نے قرض کا تقاضا شروع کردیا اور حالات دن بدن خراب ہوگئے‘ میرے والد مجھے واپس اپنے گھر لے آئے اور میرے شوہر قرض داروں کے خوف سے ایک مرتبہ پھرغائب ہوگئے۔ کچھ عرصہ بعد میرا ان سےفون پررابطہ ہوا‘ میرے شوہر کسی دوسرے شہر میں ایمانداری سے محنت مزدوری کررہے ہیں اور ان کی نیت سب کے پیسے واپس کرنے کی بھی ہے‘ اس عرصہ میں انہوں نے کافی لوگوں کے پیسے بھی واپس کردئیے ہیں۔ مجھے ہروقت اپنا شوہر اور اپنا گھر یاد آتا‘ والد کے گھر میں کتنی ہی آسائشیں ہوں مگر اپنا گھر اپنا ہی ہوتا ہے۔ اسی پریشانی میں مجھے ایک خواب نظر آیا کہ کوئی مجھے سورۂ الم نشرح پڑھنے کا کہہ رہا ہے‘ وہ خواب صبح میں نے اپنے والد محترم‘ امی جان کو سنایا اور اس سورۂ کا ترجمہ پڑھا‘ ترجمہ پڑھ کر مجھے سکون ہوا کہ میری مشکل ضرور حل ہوجائے گی اور پھر آپ کے درس بھی میں سنتی تھی اس میںبھی آپ اکثر سورۂ الم نشرح کے فضائل بتاتے ہیں۔ اب الحمدللہ گزشتہ تقریباً 7 جمعراتوں سے میں درس میں شرکت کررہی ہوں اور ہروقت باوضو ہوکر پاک حالت میں سورۂ الم نشرح پڑھتی ہوں ‘ میں حیران ہوئی کہ تھوڑے عرصہ میں ہی میرے حالات بدل رہے ہیں میرے شوہر نے تقریباً سب کا قرض اتار دیا ہے اور میں ایک ہفتہ ہوگیا ہے اپنے گھر میں واپس آچکی ہوں ‘ میرے شوہر نے دوبارہ سے سپیئر پارٹس کا کام شروع کردیا ہےاور رزق میں خوب برکت ہورہی ہے‘ چند ہمارے اپنے عزیز ایسے رہ گئے ہیں جن کا ہم نے معمولی سا قرض دینا ہےوہ ابھی انشاء اللہ اس ماہ کےآخر تک ادا کردیں گے۔