موٹاپا ، خواتین اور متوازن غذا

موٹاپا ، خواتین اور متوازن غذا :۔

 Obeseness in women, Obesity, its causes and herbal treatment 

باری تعالی کی حسین ترین مخلوق عورت ہے یہ نکتے کی بات کسی بڑے مفکر یا فلاسفر نے کہی تھی مگر اس نے یہ نہیں بتایا کہ اس حسن کو برقرار رکھنے کیلئے صحت کاملہ کی ضرورت  ہے ۔ اس کی تکمیل توانائی کے بغیر ناممکن ہے اور توانائی حاصل کرنے کا راز متوازن غذا میں مضمر ہے متوازن غذا کیا ہوتی ہے ؟ اس میں کیا کیا ہونا ضروری ہے ؟ خواتین کو کیا کیا اور کتنا کھانا چاہیئے ۔ تاکہ وہ صحت مند رہ سکیں اور خوبصورت نظر آتی رہیں ؟ نیز بیماری اور زندگی کے مختلف مراحل میں اپنی خوراک کا کس طرح خیال رکھنا چاہیے ؟ ہم یہاں ان سوالوں کے جواب پیش کرتے ہیں یہ بات تو پایہ ثبوت کو پہنچ چکی ہے کہ خواتین مردوں کی نسبت زیادہ کھاتی ہیں ۔ اور زیادہ مرتبہ کھاتی ہیں ۔ عام طور پر اس ہنستی بستی دنیا میں کھانے کے تین اوقات ہی پائے جاتے ہیں  ۔یعنی ناشتہ ، لنچ اور ڈنر ۔
ان کے درمیان ایک آدھ پیالی چائے یا کوئی مشروب استعمال کر لینا ۔ استثنائی ہے یہ طریقہ کار اس قدر مقبول عام ہے کہ فرسٹ ورلڈ یا ترقی یافتہ ممالک سے لے کر تھرڈ ورلڈ یعنی غیر ترقی یافتہ ممالک تک کے باشندے اسی معمول کو اپنائے ہوئے ہیں ۔ مرد حضرات بالخصوص جو صبح  گھر سے نکلتے ہیں اور دن ڈھلے لوٹتے ہیں ۔ان کو اس پابندی کے علاوہ کوئی چارہ کار نہیں کہ یا تو لنچ گھر سے لے کر جاتے ہیں ۔ یا حسب توفیق نان چھولے زہر مار کر لیتے ہیں ۔ ترقی یافتہ ممالک میں جہاں خواتین مساوات مردو زن کے ظور پر مردوں کے شانہ بشانہ رہتی ہیں ۔ وہ بھی دوپہر کو برگر  اور کافی سے شکم کی سیرابی کر لیتی ہیں ۔ مگر مردوں کے  مقابلے میں تمام دن ٹافیاں ، اور چیونگم ، چاکلیٹ سے تسکین دہن و شکم بھی کرتی رہیتی ہیں ۔ یہ ہی ادائے دلربائی ترقی پذیر ممالک کی خواتین نے جو گھر سے باہر رہ کر سرکنگ لیڈیز کہلانے پر فخر محسوس کرتی ہیں ۔ سیکھ لی ہے ۔ ان نازک اندام خواتین کے چھوٹے چھوٹے کندھوں پر بڑے بڑے بیگ جو لٹکتے ہیں ۔ کوئی ان میں جھانک کر دیکھے تو اس میں کچھ نہ کچھ اشیائے خوردنوش ضرور مل جائیں گی۔  

جو خواتین ہاؤس یا خاتون خانہ کہلاتی ہیں اور ملازمت کی ذمہ داری سے بری ہیں کھانے پینے کے معاملات میں کسی طرح پیچھے نہیں رہ جاتیں ۔ ہمارے ایک دوست ڈاکٹر صاحب نے جو خواتین کی عادات میں زیادہ ادراک رکھتے ہیں یہ راز بتا کر ہماری معلومات میں اضافہ کر دیا کہ عورتیں ایک مرتبہ نہیں تین مرتبہ لنچ کرتی ہیں پہلی مرتبہ جب کھانا پکاتی ہیں تو چکھنے چکھنے میں ضرور کھا لیتی ہیں ۔ دوسری مرتبہ جب بچے اسکول سے واپس آتے ہیں ۔ ان کو کھلانے میں کچھ نہ کچھ کھاتی رہتی ہیں پھر تیسری مرتبہ جب شوہر دفتر سے آتا ہے تو اس کے ساتھ باقاعدہ لنچ تناول فرماتی ہیں ۔ اگر میرے دوست صاحب کا یہ قول قاعدہ کلیہ نہیں بھی تو اس میں کچھ نہ کچھ حقیقت ضرور ہے ۔ عام خاتون کو عام حالات میں دفتر وں اور گھروں میں کام کرنے والی خاتون کو اور حمل اور بچوں کو دودھ پلانے میں روزانہ کتنے حراروں یا کیلوریز کی ضرورت پڑتی ہے ۔ تجربات اور مشاہدات کے بعد یہ معیار تسلیم کر لیا گیا ہے کہ مرد کو تین ہزار کیلوریز اور عورت کو اڑھائی ہزار کیلوریز کی ضرورت ہوتی ہے ۔ لڑکپن سے جوانی میں قدم رکھنے والے بچوں کو بھی بڑھوتری کیلئے اسی قدر کیلوریز درکار ہوتی ہیں آئیے ! اب ہم دیکھتے ہیں کہ یہ توانائی کس قدر خواراک سے مہیا ہو سکتی ہے اس قبل آپ مختلف اجناس میں جو پاکستان میں استعمال ہورہی ہیں کیلوریز کی تعداد ملاحظہ فرما لیجئے۔

روزمرہ استعمال کی اشیاء اور کیلوریز

اشیاء	وزن	توانائی
ایک کپ آٹا	120 گرام	420 کیلوریز
ایک کپ چاول	200 گرام	680 کیلوریز
ایک گلاس دودھ	244 گرام	160 کیلوریز
پکی ہوئی ملی جلی سبزی	240 گرام	150 کیلوریز
ایک انڈا	40 گرام	108 کیلوریز
پھل ہر قسم کے	240 گرام	80 کیلوریز

پلاننگ ڈویلپمنٹ ڈویژن  حکومت پاکستان ، اسلام آباد کی جانب سے مجوزہ خوراک درج ذیل ہے جس سے روزانہ تقریباً تین ہزار حرارے توانائی حاصل ہوتی ہے ۔

                                                             

                                   

                                   

اشیاء	وزن	توانائی
اناج	400گرام	1400 کیلوریز
دالیں	90 گرام	315 کیلوریز
سبزیاں پتوں والی	114 گرام	57 کیلوریز
شکر	50 گرام	55 کیلوریز
تیل یا بناسپتی	60 گرام	540 کیلوریز
گوشت ، مچھلی وغیرہ	90گرام	405 کیلوریز
انڈا ایک عدد	40 گرام	108 کیلوریز
ٹوٹل		3080 کیلوریز

                                               

 آج کل نسوانی حسن خوبصورتی کا خود ساختہ معیار یہ بن گیا ہے کہ لڑکی چہرے مہرے سے دبلی نظر آئے اور جسم چھریرا دکھائی دے اسکول یا کالج میں کسی نے ازراہ مذاق اگر کہہ دیا او موٹی تو یہ الفاظ دل میں نشتر بن کر اتر جاتے ہیں خصوصاً لڑکیاں دور بلاغت میں غیر محسوس طریقے پر بغیر سوچے سمجھے اپنی خوراک گھٹانا شروع کر دیتی ہیں جو انتہائی نقصان دہ ہے یاد رہے کہ صحت مندی اور چیز ہے اور موٹاپا اور چیز ہے ہر بھاری جسم کی لڑکی کو بغیر معقول وجہ کے اپنی خوراک ہر گز کم نہیں کرنی چاہیئے۔

موٹاپے کے بادی النظر میں تین اسباب ہیں ۔

وراثت میں ملا ہوا موٹاپا

ہارمون کی خرابی سے موٹاپا

خوش خوراکی کے سبب موٹاپا

پہلے دو اسباب کا توڑ اور علاج کم خوارکی ہر گز نہیں ہے آپ کو ماہر طبیب یا معالج سے رجوع کرنا چاہیئے ۔ 1993ء امریکہ کے ایک جائزے کے دوران 863 سمپل لئے گئے تمام تر معیاری تفتیش کے بعدنتیجہ نکلا کہ ان میں سے 783 مرد وزن صرف خوش خوراکی کی وجہ سے موٹے ہو گئے ہیں باقی میں 68 افراد کو موٹاپا وراثت میں ملا اور گیارہ افراد کو ہارمونز کی خرابی کی وجہ سے موٹاپے کا عارضہ لاحق ہو گیا اس طرح یہ نتیجہ نکلا کہ نوے فیصد موٹے افراد صرف خوش خوراکی کی وجہ سے موٹے ہو گئے ہیں امریکہ کہ ماہرین خوراک اس بات پر متفق ہیں کہ آپ اس غلط فہمی میں مبتلا نہ ہوں کہ خوراک کم کر دینے سے آپ دبلہ ہو جائیں گی اگربالفرض محال ایسا ہو بھی جاتا ہے تو آپ کئی بیماریوں کا شکار ہو جائیں گی۔ یہ بھی ایک غلط فہمی ہے کہ ورزش کرنے سے آپ کا بدن کم ہو جائے گا اور موٹاپا دور ہو جائے گا آپ کا مطلوبہ حل صرف مستقل ہے یہ نہیں کہ چار دن کر لی اور دو دن نہ کی ورنہ اس کا حساب تو وہی ہو گا کہ بقول شاعر چار دن کی چاندنی پھر اندھیری رات ہے ۔

لو کیلوری ڈائٹ موٹاپا دور کرنے کیلئے سب سے زیادہ سود مند ہے جو تمام ورکنگ لیڈیز اور گھریلو خواتین کو استعمال کرنی چاہیئے اس میں اوسطاً ساٹھ گرام پروٹین ، سو گرام نشاستہ دار غذا اور چالیس گرام چکنائی شامل ہونی ضروری ہے ۔ اس کے علاوہ دودھ 450 گرام اور چینی 20 گرام روزانہ استعمال کی جاسکتی ہے ان سب سے حاصل شدہ کیلوریز اندازاً ایک ہزار ہوتی ہیں اس غذا کا ایک ٹائم ٹیبل برٹش میڈیکل جرنل سے آپ کیلئے تحریر ہے۔

 فربہ خواتین کیلئے متوازن غذا :۔ حرارے 1000۔ بیڈ ٹی ایک پیالی چائے ، دودھ 30 گرام ناشتہ ، ایک انڈا ، توس 30 گرام ، چائے یا کافی ایک کپ ، اس میں دودھ اور چینی روزمرہ کے الاؤنس میں سے ڈال سکتے ہیں ظہرانے سے قبل ، ایک پیالی چائے یا ایک گلاس تازہ جوس ۔ لنچ یا ظہرانا، سوپ سادہ یا ٹماٹر جوس، گریپ فروٹ جوس ایک گلاس گوشت 3 عدد پکائی ہوئی عام سائز کی بوٹی ، 60 گرام یا مچھلی 60 گرام ، سالن میں تیار شدہ سبزی یا سلاد ایک پلیٹ ، پھل 240گرام سہ پہر ، چائے ایک پیالی ایک بسکٹ 10 گرام ، بغیر کریم اور چاکلیٹ کے رات کا کھانا :۔ سوپ یا یخنی ایک پیالی گریپ فروٹ جوس ایک گلاس مرغی مچھلی گوشت پکائی ہوئی 3 بوٹیاں ، 60 گرام ، روٹی ایک عدد 40 گرام ،

نوٹ:۔ ایک دن کا الاؤنس دودھ کریم نکلا ہوا 450 گرام ، چینی 20 گرام، مکھن ، کوکنگ آئل ، بناسپتی 15 گرام ، یعنی ایک درمیانی چمچ ، پھل مالٹا، کنو ، کیلا ، خوبانی، آلو بخارا، لوکاٹ ، آڑو،ناشپاتی، سیب ، خربوزہ ، تربوز ، ترکاریاں :۔ مٹر کی پھلیاں ، بند گوبھی ، گاجر، مولی ، شلجم ، پھول گوبھی، پالک ، خرفہ ، چولائی ، میتھی ، سرسوں پیاز ، لہسن ، ٹماٹر۔